सोलिड्यारिटी इन्टरनेशनल एकेडेमीमा शैक्षिक अवार्ड (सम्मान)–२०८२ भव्य रूपमा सम्पन्न

हेटौँडा, असार २९ । मकवानपुरको हेटौँडा–१० स्थित सोलिड्यारिटी इन्टरनेशनल एकेडेमीमा शैक्षिक सत्र २०८२ को वार्षिक परीक्षामा उत्कृष्ट नतिजा हासिल गर्ने विद्यार्थीहरूलाई प्रोत्साहन तथा सम्मान गर्ने उद्देश्यले आयोजित “शैक्षिक अवार्ड (सम्मान)–२०८२” कार्यक्रम भव्य रूपमा सम्पन्न भएको छ। विद्यालयले दुई दिनसम्म सञ्चालन गरेको उक्त कार्यक्रममा विभिन्न तहका उत्कृष्ट विद्यार्थी, SEE परीक्षार्थी तथा उत्कृष्ट नतिजा दिलाउन सफल शिक्षक–शिक्षिकाहरूलाई सम्मान गरिएको थियो।

विद्यालय प्रशासनका अनुसार असार २८ गते प्राथमिक तथा आधारभूत तहका विद्यार्थीहरूका लागि सम्मान कार्यक्रम सञ्चालन गरिएको थियो भने असार २९ गते माध्यमिक तहका विद्यार्थीहरूलाई सम्मान गरिएको थियो। कार्यक्रममा शैक्षिक उपलब्धिका आधारमा विद्यार्थीहरूलाई मेडल, प्रमाणपत्र तथा नगद पुरस्कार प्रदान गरी सम्मान गरिएको थियो। कार्यक्रमको मुख्य आकर्षणका रूपमा शैक्षिक सत्र २०८२ को वार्षिक परीक्षामा उत्कृष्ट नतिजा ल्याई प्रथम, द्वितीय तथा तृतीय स्थान हासिल गर्ने विद्यार्थीहरूलाई विशेष सम्मान गरिएको थियो। विद्यालयले उत्कृष्टता हासिल गर्ने विद्यार्थीहरूको हौसला बढाउन मेडल, प्रमाणपत्र तथा नगद पुरस्कार प्रदान गरेको थियो । यसबाट विद्यार्थीहरूमा अध्ययनप्रति थप लगाव, अनुशासन र प्रतिस्पर्धात्मक भावना विकास हुने विश्वास विद्यालयले लिएको  छ। यसैगरी विद्यालयमा अध्ययनरत कक्षा ९ र १० का विद्यार्थीहरूमध्ये विद्यालयको नेतृत्वदायी भूमिकामा रहेका स्कूल क्याप्टेन, सहायक क्याप्टेन, हाउस क्याप्टेन तथा विभिन्न जिम्मेवारी सफलतापूर्वक निर्वाह गरेका विद्यार्थीहरूलाई पनि विशेष सम्मान गरिएको थियो। विद्यालयको शैक्षिक तथा अतिरिक्त क्रियाकलापलाई प्रभावकारी बनाउन महत्त्वपूर्ण योगदान पुर्‍याएका यस्ता विद्यार्थीहरूको योगदानको कदरस्वरूप सम्मान गरिएको विद्यालयले जनाएको छ।

कार्यक्रममा SEE–२०८२ मा सहभागी भई उत्कृष्ट GPA प्राप्त गर्न सफल तथा A+ हासिल गरेका विद्यार्थीहरूलाई नगद पुरस्कारसहित विशेष सम्मान गरिएको थियो। विद्यालयले आफ्ना पूर्वविद्यार्थीहरूको उत्कृष्ट उपलब्धिलाई गर्वका साथ स्मरण गर्दै उनीहरूलाई आगामी अध्ययन यात्राका लागि शुभकामना समेत प्रदान गरेको थियो।

त्यसैगरी, SEE–२०८२ मा आफूले अध्यापन गरेको विषयमा शतप्रतिशत नतिजा ल्याउन सफल शिक्षक तथा शिक्षिकाहरूलाई पनि मेडल र नगद पुरस्कारसहित सम्मान गरिएको थियो। विद्यालयको उत्कृष्ट शैक्षिक उपलब्धिमा शिक्षकहरूको भूमिका महत्त्वपूर्ण रहेको उल्लेख गर्दै विद्यालय व्यवस्थापनले उनीहरूको मेहनत, समर्पण र जिम्मेवारीको उच्च मूल्याङ्कन गरेको जनाएको छ।

कार्यक्रममा विद्यालयका अध्यक्ष, प्रधानाध्यापक, शिक्षक–शिक्षिका, अभिभावक, विद्यार्थी तथा विद्यालय परिवारका अन्य सदस्यहरूको उल्लेखनीय उपस्थिति रहेको थियो। वक्ताहरूले विद्यार्थीहरूको सफलताले विद्यालयको गौरव बढाएको उल्लेख गर्दै आगामी दिनमा अझ उत्कृष्ट नतिजा हासिल गर्न निरन्तर प्रयासरत रहन प्रेरणा दिएका थिए। सम्मान कार्यक्रमले विद्यार्थीहरूमा अध्ययनप्रति उत्साह जगाउनुका साथै मेहनत, अनुशासन र लगनशीलताको महत्वलाई थप स्थापित गरेको सहभागीहरूको भनाइ थियो। विद्यालयले आगामी वर्षहरूमा पनि यस्ता सम्मान कार्यक्रमलाई निरन्तरता दिँदै उत्कृष्ट कार्य गर्ने विद्यार्थी तथा शिक्षकहरूलाई प्रोत्साहन गर्ने प्रतिबद्धता व्यक्त गरेको छ।

सोलिड्यारिटी इन्टरनेशनल एकेडेमीले हरेक वर्षझैँ  यस वर्ष पनि उत्कृष्ट नतिजा हासिल गर्ने विद्यार्थी तथा शिक्षकहरूको सम्मान गर्दै शैक्षिक उत्कृष्टतालाई प्रोत्साहन गर्ने आफ्नो परम्परालाई निरन्तरता दिएको छ। दुई दिनसम्म सञ्चालन भएको उक्त कार्यक्रम सफलतापूर्वक सम्पन्न भएको विद्यालय प्रशासनले जनाएको छ।